Os procedementos administrativos son unha carreira de obstáculos e de fondo, porque calquera intento por axilizalos parece estar condenado a toparse con novos escollos que retardan o traballo. Isto sábeno ben no Concello de Ribeira, onde todos os esforzos para apurar o proxecto de urbanización do novo polígono industrial están a se ver freados.
O último contratempo veu de Patrimonio, nesta ocasión polo percorrido da liña de gas e a súa proximidade á necrópole de San Alberto. Explica o alcalde en funcións, Manuel Ruiz, que o problema se emendou.
O mandatario sinala que, hai uns días, mantiveron un encontro con técnicos de Patrimonio e que se chegou a un acordo sobre o trazado da condución. O Concello está agora á espera de recibir o informe favorable para ter vía libre.
Neste sentido, Manuel Ruiz comenta que así podería autorizarse o proxecto de urbanización, dado que o Concello iniciou os trámites de contratación á vez que se xestionaban os permisos de Administracións superiores.
Ler máis: La Voz de Galicia