A Xunta informou onte que acaba de pechar a venda dunha nova parcela no polígono de Morás , en Arteixo. Aínda que non desvelou o nome da firma, si sinalou que a compradora é unha empresa do sector de almacenaxe e transporte de mercadorías. O solar vendido ten unha superficie de 4.143 metros cadrados. Con esta operación, o Executivo autonómico xa logrou vender seis parcelas nos dous últimos meses.
Esta última adquisición de chan súmase ás efectuadas por Carechem Distribución, Progando, Auxiembal, Fixagal e Kusilas, que presentaron ofertas no último concurso de venda de chan industrial convocado pola Xunta. A venda formalizouse o pasado mes, en maio. Antes xa compraran terreos no polígono Fillos de Rivera, Aluman e os liberados da expropiación.
A venda do cinco parcelas realizada en maio foi a primeira que se realizou despois de facerse pública a compra por parte de Fillos de Rivera, propietaria de Estrela Galicia, de case medio millón de metros cadrados no parque empresarial, o que equivale á metade da superficie útil desta zona industrial. Agora súmase outra nova empresa.
No concurso público de venda de chan que se resolveu en maio atoparon comprador cinco dos 34 solares, é dicir, quedaron sen demanda 29. Para estas últimas, a Consellería de Medio Ambiente anunciou que unha vez resolta a licitación poderanse asignar a partir de agora “de forma directa a aquelas empresas que vaian mostrando o seu interese e sempre coas mesmas condicións”, tal e como ocorreu nesta última operación.
FONTE: La Opinión Coruña