O plan para construír o polígono de Vío na Coruña aprobouse hai case dous decenios, concretamente no ano 2003, coa idea de convertelo nun gran centro industrial e terciario. Con todo, e a pesar da inxente cantidade de diñeiro investido na súa urbanización, os seus 700.000 metros cadrados de superficie seguen baleiros á espera de que se concrete, por fin, unha adecuada conexión viaria. Precisamente, esta carencia de boas comunicacións fixo que máis dunha vintena de empresas descartasen nos últimos dous anos situarse no polígono de Vío. Así, aínda que a sociedade encargada da xestión da área dotacional tivo numerosos encontros e contactos con grandes e mediana empresas, entre elas Amazon, todas descartaron asentarse no chan dispoñible non por prezo, senón porque aínda non está construída a denominada cuarta rolda. Esta vía, de algo menos de tres quilómetros de lonxitude, permitiría enlazar por autovía os peiraos interiores da Coruña co porto exterior e daría servizo aos polígonos de Pocomaco e Vío, ademais de favorecer outra saída alternativa para o polígono da Grela. Tamén está pendente de execución un viario municipal de servizo que discorrerá paralelo á cuarta rolda e que dará saída a Vío sen pasar por Pocomaco.
Ler máis: La Voz de Galicia