A Xunta, a través da Consellería de Medio Ambiente, anunciou este pasado mércores o desenvolvemento dun parque empresarial entre Redondela e Mos que terá medio millón de metros cadrados e que será clave para futuras factorías. É unha cifra importante, que contrasta coas previsións do novo Plan Xeral de Vigo: o medio millón nunha soa actuación case suma a mesma superficie prevista na PXOM con destino a novo uso terciario (industrial e dotacional) exclusivo. En concreto, o Plan establece tres sectores de chan urbanizable cunha superficie bruta de 21,22 hectáreas con capacidade para 180.366 metros cadrados construídos. Igualmente establécense seis sectores con destino a uso industrial-terciario oscilando a porcentaxe de uso terciario entre o 10% para a ampliación de Balaídos e o 40% para os restantes. Abarcan unha superficie bruta de 63,40 hectáreas. A capacidade total destes sectores alcanza 145.487 metros de uso terciario e 359.629 metros de uso industrial. Ademais incorpóranse como ámbitos de chan urbanizable os que deveñen dos instrumentos de rango supramunicipal, Plan Sectorial de Ordenación de áreas empresariais de Galicia e Proxecto Sectorial de ampliación do Parque Tecnolóxico e Loxístico, con capacidade para 280.321 metros construídos. En teoría sería chan industrial, pero a previsión é que sexa comercial (Ikea e outras). En canto a Balaídos, será segundo as necesidades de Stellantis. É dicir, que as posibilidades reais de chan empresarial novo en Vigo son moi reducidas e de feito o propio Plan sinala a área metropolitana para novas empresas.
SEGUIR LENDO: Atlántico Diario