O presidente da Xunta de Galicia, Alfonso Rueda, pediulle este luns á ministra de Industria, Reyes Maroto, que "concrete" cando van obter o financiamento solicitado dos fondos europeos grandes proxectos industriais con base en Galicia, como o de Altri ou a proposta de Stellantis, porque o seu futuro está en "risco".
En declaracións aos medios de comunicación, no transcurso dunha de visita ás obras de ampliación do parque empresarial de As Gándaras, en Lugo, Rueda dixo que, "como presidente da Xunta de Galicia", está "moi preocupado" pola evolución dos acontecementos, porque "son proxectos que se tivesen financiamento crearán miles de postos de traballo".
"Os fondos Next Generation teñen uns prazos. As empresas tamén teñen uns prazos de funcionamento, e nada sabemos. Empézanse a acender as luces de alarma", recoñeceu Rueda.
"Na provincia de Lugo temos o proxecto de Altri. Un proxecto maduro, que está a pedir 200 millóns de euros para chegar a investir até 1.300 e que, a día de hoxe, segue sen ningunha certeza de se vai conseguir ou non eses fondos", lamentou Rueda.
MÁIS DIÑEIRO E MENOS "PROCLAMAS"
O presidente da Xunta tamén se referiu á situación "de Stellantis, a maior fábrica de automóbiles de España, que quedou fóra dun PERTE do automóbil mal deseñado". Agora, lembrou, "está a expensas dun segundo PERTE do automóbil, que se prometeu hai meses e do que nada se sabe aínda".
"Pediríalle á ministra de Industria que concrete cando estes proxectos van obter financiamento para crear riqueza e postos de traballo. A día de hoxe non o sabemos. O deseño e a execución dos PERTEs industriais deixa moito que desexar, sinceramente", engadiu.
Rueda afirmou que "non é certo" que estea "chegando continuamente o diñeiro dos fondos Next Generation e das axudas europeas ás empresas galegas", tal e como di o Goberno.
Máis aló das "proclamas", do propio executivo, con respecto a "a distribución dos fondos Next Generation nas pequenas e medianas empresas, no tecido de autónomos e de pemes en Galicia, ese diñeiro non chegou".
Fuente: Cope