A Xunta de Galicia, o Porto de Vigo e a Zona Franca acaban de alcanzar un acordo para comercializar 127.300 metros cadrados máis na Plataforma Loxística de Salvaterra - As Neves, a Plisan. Os terreos analizados atópanse na zona norte, coñecida como área Loxística Empresarial (LLE). As institucións promotoras cifran a tasación en 10,2 millóns de euros por un período de dous anos.
Rexístrache gratis e recibe cada mañá no teu correo as principais noticias do día
A nova dotación dividirase en 32 parcelas de diversas superficies, nun rango de entre 2.100 até 11.500 metros cadrados. A única empresa que xa traballa na Plisan desde hai escasos días, Conservas Albo, ocupa unha superficie duns 63.000 metros.
Na reunión de seguimento que tivo lugar hoxe, se facultó ademais ao Instituto Galego de Vivenda e Solo para ser a entidade que leve a cabo a nova comercialización destas parcelas da Plisan. Tamén se acordou dar luz verde ao IGVS para licitar o contrato da explotación, conservación e mantemento do servizo en alta da auga da plataforma loxística. Este servizo implica a captación e tratamento na estación de tratamento de auga potable da Plisan e a súa subministración en alta a través das redes xerais de abastecemento das distintas fases de urbanización, así como a recollida de augas das redes de evacuación até a depuradora da plataforma, para a súa posterior depuración.
Ler máis: La Voz de Galicia