O Concello do Barco de Valdeorras construirá unha rotonda na entrada do polígono industrial da Raña. Estará situada xunto ao final da ponte sobre o río Sil. Con esta obra búscase obrigar a reducir a velocidade coa que os vehículos entran no recinto e resolver o acceso ás dúas primeiras rúas laterais a ambos os dous lados do parque empresarial. Actualmente para poder acceder a elas é preciso ir até o final da rúa principal para virar na glorieta. Ademais construiranse novas beirarrúas naqueles puntos nos que están deterioradas e se fresarán e asfaltarán varias rúas.
A obra sairá a licitación nas próximas semanas por un orzamento de 150.000 euros, dos que 120.000 serán achegados pola Xunta.
Seguir lendo: La Voz de Galicia, Valdeorras de Cerca
Fecha publicacion:
2023-04-15 06:00:00