O pasado día 23 de marzo terminou o prazo para presentar ofertas ao concurso de venda de chan empresarial convocado pola Xunta en 17 polígonos industriais de toda Galicia en febreiro. Un deles é o de Morás, situado en Arteixo, que recibiu cinco proposicións de empresas para facerse coa propiedade de cinco das 34 parcelas que saíron a poxa pública, segundo detalla a Consellería de Medio Ambiente, Territorio e Vivenda, á que está adscrito Xestur, organismo que realiza este concurso. É a primeira venda que se realiza tras facerse pública a compra por parte de Fillos de Rivera, propietaria de Estrela Galicia, de case medio millón de metros cadrados no parque empresarial, o que equivale á metade da superficie útil desta zona industrial.
A superficie demandada no polígono polo cinco empresas é de 18.483 metros cadrados, o que supón ?a maior extensión de chan solicitada en todas as áreas empresariais incluídas na oferta de 2021 de Xestur para toda Galicia?, segundo indica Medio Ambiente. O solar co prezo máis económico custaba 184.239 euros e o máis caro, 1.215.559 euros, incluídas as bonificacións no prezo. Todos os terreos que saíron á venda teñen un uso industrial-terciario e os interesados podían optar a unha bonificación máxima dun 30%.
Unha vez recibidas o cinco ofertas para comprar no polígono arteixano, Xestur deberá comprobar que toda a documentación estea correcta e proceder á adxudicación dos correspondentes solares. Despois abrirase un procedemento de adxudicación directa, no que poderían aparecer novos interesados para adquirir chan en Morás.
A comercialización das parcelas do parque empresarial alcanzaba xa o 68,5% da superficie dispoñible antes destas vendas, xa que, ás adquisicións de grandes extensións de chan efectuadas por Estrela Galicia e Aluman, súmanse as realizadas por vinte empresas de menores dimensións que compraron 80.000 metros cadrados.
SEGUIR LEYENDO: La Opinión