A tramitación da certificación de Polígono Empresarial de Calidade para o parque empresarial de Bértoa esperará a que a terceira fase da ampliación sexa realidade. Aínda que a obtención deste selo é algo no que leva traballando a xerencia do polígono carballés desde antes da pandemia, decidiron postergalo polo momento. “Cremos que ten máis sentido que o tramitemos unha vez que se complete a ampliación, para que o certificado sexa para todo o polígono”, explicou o xerente Pablo Rodríguez.
Ata o momento só hai un polígono en Galicia que sexa un “Polígono Q”, o da Grela, e o de Carballo aspira a ser o segundo. En toda España hai en total 18 polígonos con este certificado, a maior parte deles en Cataluña, o País Vasco e Asturias.
Trátase dun modelo estándar específico da Coordinadora Española de Polígonos Empresariais, desenvolto en exclusiva para certificar a calidade das áreas de actividade económica como espazos de valor e de xeración de riqueza para o territorio, sexa cal for a súa configuración. De feito, é o primeiro e único estándar de calidade definido no ámbito europeo.
É un proxecto importante que podería dilatarse máis do esperado en vista da lentitude coa que avanzan os trámites administrativos para a ampliación.
Ler máis: Diario de Bergantiños